Easy mama mek mi help yu si dung
Yu dey pan yu feet all day lang
Come eat yu dinna an tek yu pills
Docta sey diabetes an pressure kills
Den son, a dem a keep mi alive
So much, one two tree fore five
Tell di docta a nuh him alone healing
If mi get anada day a di lawd willing
Anyway, bless yu mi son
Yu a di las wan
Mama time fi yu bade an go a yu bed
Lay dung mama an rest yu head
Dream a di days gaan by tonight
Rise wid di glorious maanin light
Alrite, Bless yu mi son
Yu a di las wan
Yu know sey Petal gaan
Junior gaan
Woe Lard a miss mi children
Now mi precious Edgar
Gaan an falla dem
Woe lard a miss mi husban
A jus caan undastan
But bless yu mi son
Yu a di las wan
A eternal life everywan desire
But we nuh come pan earth fi retire
I jus hope a won’t be aroun
To si anada wan go ina di groun
Mama don’t worry di heart ina yu chess
Now close yu eyes yu need di ress
Ok, Bless yu mi son
Yu a di las wan
Yes mama close dose eyes
I will be here when yu rise
Mama a jus waan yu know
Woe lard a love yu so
Mek me hug yu real tight
Now have a blessed night
Tank yu an bless yu mi son
Yes mama a know
A mi a di las wan
...............................
Mama yu had a good nite sleep
Di whole nite a neva hear a peep
Mama, mama, mama, mama
No mama, mama no
Woe lard a love yu so
Mek me hug yu real tight
A know yu put up a blessed fight
Mamaa mamaaaa
Bless yu mama
Yes a know mi a di las wan

__________________

Jah I've soooo missed your poems, nice comeback. That's very sad.
I think the patwah made it 100 times better for me, it set the mood well. I could envision the whole thing.

Respect.

__________________

__________________